راگەیەنراوێک لە سەرۆکایەتی زانکۆی گەرمیانەوە

بەپێویستی دەزانین بۆ هەموو لایەکی رابگەیەنین کە سەرۆکایەتی زانکۆمان داواکاری خوێندکارانی زانکۆو پەیمانگاکان بۆ پێدانی دەرماڵەی خوێندن بەڕەوا دەزانێت و پشتگیری تەواوی دابینکردنی دەکەین ، چونکە پێمانوایە خوێندکارانی زانکۆ و پەیمانگاکان بەگشتی لە بارودۆخێکی دارایی ناهەمواردان و پێشتریش ڕەوایی ئەم داواکارییەمان دووپات کردوەتەوە و لەلایەن وەزارەتی خوێندنی باڵاو توێژینەوەی زانستی گفتوگۆی لەسەر کراوە و پێشکەش بە ئەنجومەنی وەزیران و وەزارەتی دارایی حکومەتی هەرێمی کوردستان کراوە

لە ئێستادا ، کە دوو رۆژە خۆپیشاندانی خوێندکاران بۆ پێدانی دەرماڵەی زانکۆیی لە ئارادایە ، سەرباری ئەوەی داواکە بە رەوا دەزانین لە هەمانکاتدا جەخت لە پێویستی پاراستنی حەرەمی زانکۆیی دەکەینەوە و ئیدانەی هەر پێشێلکاری و توندوتیژییەک دەکەینەوە کە لە دەرەوەی یاسا و رێنماییەکان ئەنجام بدرێت .

هەر لێرەوە داواکارین خوێندکاران داخوازییەکانیان بەشێوازێکی شارستانیانە و بەجۆرێک کەلە ئاستی پێگەی شیاوی خوێندکاری زانکۆدا بێت، پێشکەش بکەن و هەروەک بۆ پاراستنی سەلامەتی گیانی خوێندکاران وبەردەوامی ڕەوتی خوێندن داواکارین پابەندبن بە خوێندنی وانە و تاقیکردنەوەکانیان ، جارێکی تر هەموو لایەک لە پەرۆشیمان بۆ چارەسەرکردنی پرسەکە دڵنیادەکەینەوە